మాట క‌ర‌కు.. గుండెల్లో ఏదీ దాచుకోరు.. ఉన్న‌ది ఉన్న‌ట్లు ముఖం మీద చెప్పేస్తారు.. అందుకే ఆయ‌న్ని చూస్తే కొంత మందికి భ‌యం.. కొంద‌రికి ఇబ్బంది.. అయితేనేం కోట్లాది మంది అభిమానుల‌కు మాత్రం ఎంతో ఇష్టం. ఆయ‌నే నంద‌మూరి బాల‌కృష్ణ. సినిమాల్లో హీరోగా బిజీగా ఉంటూనే రాజ‌కీయాల్లోనూ రాణిస్తున్నారు. అంతేనా ఇంత బిజీలోనూ ఓటీటీలో టాక్ షోస్‌ను కూడా చేస్తున్నారు. ఇవ‌న్నీ ఒక‌వైపు.. మరో వైపు బ‌స‌వ తార‌కం ఇండో అమెరిక‌న్ క్యాన్స‌ర్ హాస్పిట‌ల్‌కు చైర్మ‌న్‌గా బాధ్య‌త‌లు నిర్వ‌హిస్తున్నారు. పేద, ధ‌నిక అనే తేడా లేకుండా ఈ హాస్పిటల్లో కాన్స‌ర్‌కి చికిత్స‌ను అందిస్తుంటారు.
తాజాగా ఓ అసిస్టెంట్ డైరెక్ట‌ర్‌కి నంద‌మూరి బాల‌కృష్ణ చేసిన సాయం గురించిన వివ‌రాలు బ‌య‌ట‌కు వ‌చ్చాయి. కానీ వాటిని ఆయన బ‌య‌ట‌కు చెప్పుకోలేదు. ఒక‌టి రెండు కాదు.. ఏకంగా ఆయన చేసిన సాయం విలువ రూ.40 లక్షలు. ఈ సంఖ్య వింట‌నే అబ్బో అని అనుకోక త‌ప్ప‌దు. అస‌లు అంత పెద్ద సాయాన్ని బాల‌కృష్ణ స‌ద‌రు అసిస్టెంట్ డైరెక్ట‌ర్‌కి ఎందుకు చేశార‌నే వివ‌రాల్లోకి వెళితే..డైరెక్ట‌ర్ బోయ‌పాటి శ్రీను ద‌గ్గ‌ర మ‌హేష్ యాద‌వ్ అనే యువ‌కుడు అసిస్టెంట్ డైరెక్ట‌ర్‌గా విన‌య విధేయ రామ చిత్రానికి వ‌ర్క్ చేశాడు. త‌న‌కు బ్రెయిన్ ట్యూమ‌ర్ వ‌చ్చింది. ప్రైవేట్ హాస్పిట‌ల్‌కి వెళితే.. దాన్ని తొల‌గించ‌టానికి ఆప‌రేష‌న్ చేయాల‌ని, అందుకు రూ.40లక్షలు ఖ‌ర్చు అవుతుంద‌ని చెప్పారు. మ‌హేష్ ద‌గ్గ‌ర అంత డ‌బ్బులు లేవు.
విష‌యం ద‌ర్శ‌కుడు బోయ‌పాటి శ్రీనుకి తెలిసింది. బాల‌కృష్ణ‌తో ఆయ‌న‌కు మంచి అనుబంధం ఉంది. దాంతో బోయ‌పాటి బాలృష్ణ‌కు విష‌యం చెప్ప‌గా.. ఆయన త‌న ఇండో అమెరిక‌న్ బ‌స‌వ‌తార‌కం హాస్పిటల్లో ఎలాంటి డ‌బ్బులు తీసుకోకుండా బ్రెయిన్ ట్యూమ‌ర్‌ని తొల‌గించార‌ట. ఆ విధంగా చూస్తే అసిస్టెంట్ డైరెక్ట‌ర్‌కి బాల‌కృష్ణ రూ.40 లక్షలు సాయాన్ని అందించిన‌ట్లేగా.
