వెండితెరపై ఓ వెలుగు వెలిగి.. రాజకీయాలలో రాణించిన నటీ నటులు ఎందరో ఉన్నారు. సీనియర్ ఎన్టీఆర్ మొదలు కొని.. చిరంజీవి వరకు రాజకీయాలలో ఎంతో ఆదరణ పొందుకున్నారు. ఇక ఈ తరహాలోనే.. చిన్న చిన్న వారు కూడా.. ఎమ్మెల్యేలు ఎంపీలు అయి ప్రజల్లో పేరు ప్రఖ్యాతలు సంపాదించిన వారు ఉన్నారు. ఈ నేపధ్యంలోనే.. ఓ నటి.. మరో నాటిని తెగ పొగిడేశారు. తెలుగుదేశం పార్టీ నుంచి బయటకు వచ్చిన అందరూ మహిళా నటీమణులలో ఆర్కే రోజా మాత్రం భిన్నమని, టిడిపి నుండి బయటకు వచ్చినా.. రియల్ పొలిటీషియన్ గా మారి ప్రజలకు మంత్రిగా సేవ చేస్తున్నారని మంత్రి రోజాను ఓ రేంజ్ లో పొగిడేశారు… సీనియర్ నటి దివ్యవాణి. సినిమాల నుంచి రాజకీయాల్లోకి వెళ్లే నటీనటులను చాలామంది చిన్నచూపు చూస్తారని, వారికి జనంలో గౌరవం తగినంతగా ఉండదని దివ్యవాణి పేర్కొన్నారు. అయితే రోజా మాత్రం సినీ నటులు కూడా రాజకీయాల్లో రాణించగలరని రుజువు చేశారని, మహిళా శక్తికి నిదర్శనంగా నిలిచారని వ్యాఖ్యలు చేశారు.
టిడిపి లో ఉన్నప్పుడు రోజా, తాను కలిసి పని చేశామని చెప్పిన దివ్యవాణి తమ ఇద్దరి మధ్య ఎటువంటి గొడవలు లేవని స్పష్టం చేశారు. భవిష్యత్తులో రోజాతో కలిసి పనిచేయాల్సి వస్తే తప్పకుండా కలిసి పనిచేస్తానని, తనకు ఎటువంటి అభ్యంతరం లేదని దివ్యవాణి స్పష్టం చేశారు. త్వరలోనే తన రాజకీయ ప్రయాణం పై మరో నిర్ణయం తీసుకుంటానని దివ్యవాణి తెలిపారు. దీంతో దివ్యవాణి తాజాగా చేసిన వ్యాఖ్యల నేపథ్యంలో ఆమె వైసిపి తీర్థం పుచ్చుకుంటారా అన్న చర్చ రాజకీయ వర్గాలలో ఆసక్తికరంగా మారింది. మరి ఆమె ఏ పార్టీలోకి కండువా కప్పుకుంటారో చూడాలి.
