చంద్రబాబు నాయుడు కృష్ణా జిల్లా పర్యటన నేపధ్యంలో గుడివాడలో తీవ్ర ఉద్రిక్తత చోటుచేసుకుంది. వైసిపి కార్యాలయం శరత్ థియేటర్ మీదుగా చంద్రబాబు రోడ్ షో కొనసాగగా అంతకు ముందే అక్కడికి భారీగా వైసిపి నాయకులు కార్యకర్తలు చేరుకున్నారు. వైసిపి జెండాలు ప్రదర్శిస్తూ నినాదాలు చేసారు.ఈ క్రమంలోనే ఉద్రిక్తత చోటుచేసుకోగా ఓ దశలో టిడిపి, వైసిపి నాయకులు తన్నుకున్నారు. ఈ పరిస్థితిని ముందుగానే ఊహించి భారీగా మొహరించిన పోలీసులు ఇరువర్గాలను అదుపు చేసాయి. అయితే.. నేడు గుడివాడలో చంద్రబాబు క్రైస్తవ సంఘాల సమావేశాన్ని నిర్వహిస్తున్నారు. ఈ సమావేశాన్ని అడ్డుకుంటామని వైసిపి క్రిస్టియన్ సెల్ నాయకులు సంచలన వ్యాఖ్యలు చేశారు. దీంతో గుడివాడలో చంద్రబాబు పర్యటన ఉత్కంఠంగా మారింది. చంద్రబాబు హయాంలో దళితులకు ఎలాంటి న్యాయం జరగలేదని, ఇప్పుడేదో సమావేశాలు పెట్టి తమకేదో న్యాయం చేసినట్టు గొప్పలు చెప్పుకోవడానికంటే.. దళితులకు ఎలాంటి ఉపయోగం లేదని దళిత నాయకులు అంటున్నారు. ఈ నేపధ్యంలోనే గుడివాడలో ఎలాంటి పరిణామాలు చోటుచేసుకుంటాయో చూడాలి.
