విజయవాడ దుర్గమ్మ దర్శనానికి వెళ్లే భక్తులకు సంబంధించి ప్రభుత్వం కీలక నిర్ణయం దిశగా అడుగులు వేస్తోంది. అమ్మవారి దర్శనానికి విచ్చేసే భక్తులకు దేవస్థానం బస్సుల్లో ఉచిత ప్రయాణ సదుపాయం కల్పించేందుకు కసరత్తు జరుగుతోంది. దుర్గగుడికి సంబంధించి తొమ్మిది బస్సులు ఉన్నాయి.. అందులో నాలుగు బస్సులను రోజూ విజయవాడ రైల్వేస్టేషన్, బస్టౌండ్ నుంచి దుర్గగుడికి నడుస్తున్నాయి. మరో మూడు బస్సులను కొండ దిగువన ఉన్న దుర్గాఘాట్‌ నుంచి వెళుతోంది.
ప్రతి రోజూ ఉదయం 5 నుంచి రాత్రి 9 గంటల వరకు రైల్వేస్టేషన్, బస్టాండ్–దుర్గగుడి మధ్య బస్సులు నడుస్తున్నాయి. మామూలు రోజుల్లో 16 సార్లు, పండుగలు, ప్రత్యేక రోజుల్లో 20 సార్లు బస్సులు తిరుగుతాయి. ప్రతి రోజూ 30వేల నుంచి 40 వేల మంది భక్తులు.. అదే వీకెండ్‌లో 50వేల నుంచి 60 వేల మంది భక్తులు అమ్మవారిని దర్శించుకుంటున్నారు. వీరిలో సాధారణ రోజుల్లో 4 వేల నుంచి 5 వేల మంది.. అదే వీకెండ్, ప్రత్యేక రోజుల్లో 7 వేల నుంచి 10వేల మంది వరకు దేవస్థానం బస్సుల్లో ప్రయాణిస్తారు.
విజయవడ బస్టాండ్, రైల్వేస్టేషన్, దుర్గాఘాట్‌ నుంచి కేవలం టికెట్ రూ.10 వసూలు చేస్తారు. ఇలా దేవస్థానానికి ఏడాదికి సుమారు రూ.4 కోట్ల వరకు ఆదాయం వస్తోంది. ఆయిల్, ఇతర రిపేర్లు, జీతాలతో ఖర్చులు పోను రూ. కోటి మేరకు ఆదాయం వస్తోంది. ఇప్పుడు రైల్వేస్టేషన్, బస్టాండ్, దుర్గాఘాట్‌ నుంచి కొండపైకి దేవస్థానం నడుపుతున్న బస్సుల్లో వసూలు చేస్తున్న ఛార్జీని రద్దు చేయాలని ప్రతిపాదించారు. ఈ మేరకు దేవదాయశాఖ మంత్రి, కమిషనర్‌కు ఆలయ అధికారులు లేఖ రాశారు. ఈ నిర్ణయం అమల్లోకి వస్తే వచ్చే భక్తులకు ఆర్థికంగా ఉపశమనం కలుగుతుందని అధికారులు చెబుతున్నారు.
